Charla
CEMS ta informáOra yama 912 duna informashon korekto i no eksagerá i dramatisá un kaso.
E motibu di kon sentralistanan di sentral di ambulans ta hasi sierto pregunta ora bèl na 912 pa petishon di kuido di ambulans.
E ta bai tokante di e importansha di kon un sentralista ta hasi sierto preguntanan. Den e rúbrika aki nos lo bai enfatisá riba e punto aki, pero banda di esaki nos lo bai buska otro formannan kon nos por yega na e gran mayoria pa nan haña e informashonnan relevante.
Ta di sumo importansha na bienestar di e pashènt pa esun ku hasi petishon di kuido di ambulans duna datonan korekto i mas tantu ku ta posibel kompleto. Datonan manera kiko a pasa ku e persona, ki sorto di malesa e persona ta sufri di dje, kua remedi e ta usa, ta kiko ta kousa di su nesesidat di kuido, ken ta su dòkter di kas òf speshalista, adrès, edat, sekso, number di telefon si ta posibel kaminda por yama tuma mas informashon tokante di e pashènt, eks. Ora un hende bèl den su ansha i e lubidá di duna algu dato semper e sentralista por bèl bek. A base di e datonan aki un sentralista ta determiná ku ta hustifiká pa saka un ambulans pa duna asistensha.
No eksagerá ora yama 912 (CEMS).
Mester menshoná tambe ku no ta tur ora ta honra un petishon pa kuido di ambulans, pasobra tin kasonan ku un dòkter di kas mes por atendé e situashon.
Lokual ta pasando ta ku te ainda riba un base basta struktural e sentralista ta haña diferente remarke ku nan ta hasi muchu pregunta.
Den pasado no tabata hasi hopi pregunta pasobra e sistema tabata di “Go Get and Dump”, pero den e último 10 pa 15 añanan e sistema di ambulans a kambio drástikamente, pasobra sientifikamente a keda proba ku e promé minütnan di un pashènt òf víktima ta esnan mas esensial pa su eksistensha. Ta p’esei e sentralista ta hasi diferente preguntanan ku por hasi mas fásil ku un enfermero riba ambulans por saka un diagnósis di trabou pa asina e duna un intervenshon médiko mas efikas ku ta na bienestar di e pashènt. Ainda ora nos sentralista pidi informashon nos ta konstatá ku no tin komprenshon di e esnan ku ta hasi e petishon ku ta importante pa disponé di mas informashon, pasobra ainda e konsepto ta biba - ku mas lihé un ambulans yega mas lihé e persona wòrdu transportá ta mas mihó pa e pashènt òf e víktima.
A wòrdu demostrá kaba ku stabilisá un pashènt òf un víktima promé, despues ku a haña mas informashon di su estado, i despues transporte tin mas resultado positivo pa e pashènt òf víktima.
Nos ke hasi un supliká na tur hende ku a tuma nota di e informashon aki i na dado momento mester yama CEMS na 912 pa petishon di kuido di ambulans pa nan purba di ta mas kompleto ku ta posibel, asina bo mes por aportá di salba bida di e pashènt òf víktima ku bo a bèl pidi yudansa pe. Ser sinsero i korekto pa aportá na un bon kuido di ambulans.