• Charla
• Prevenshon
• Yama 912

Prevenshon

CEMS ta informá

Nos ta den temporada di Karnaval.

CEMS ta pidi pueblo en general i speshalmente outomobilistanan pa durante di Karnaval tene kuenta ku e aspektonan di seguridat.

Temporada di Karnaval ta un temporada di hopi moveshon aki na Kòrsou.
Den nos legria pa disfrutá di e aktividatnan aki, sa sosodé ku nos grado di responsabilidat pa nos mes i pa otronan ta baha drástikamente. Speshalmente pa loke ta trata tráfiko, esaki por trese konsekuensianan hopi serio.

CEMS ta di opinion ku seguridat mester prevalesé semper riba tur aspekto. Durante di periodo di Karnaval, personal di CEMS a yega di duna asistensia na aksidentenan di tráfiko, kaminda aspekto “seguridat” a laga hopi di deseá.

Algun ehèmpel ta:

• korementu ku pasahero den baki di pikòp ku tabata embolbí den aksidente;
l
• muchanan chikitu sinta dilanti ku a keda leshoná;
• pasahero ku no tabata tin faha di seguridat ku asta a keda paralítiko;
• pasamentu den lus kòrá;
• vehíkulonan pisa ku a subi riba pia di personanan ku tabata bailando;
• ets.

Pa e motibunan aki riba menshoná CEMS kier a hasi un apelashon na pueblo di Kòrsou en general i partikularmente na outomobilistanan i esnan ku ta disfrutando di aktividatnan Karnavalesko pa pone seguridat na promé lugá pa di e forma ei nos temporada di Karnaval resultá unu eksitoso sin ku nos mester tin kasonan di aksidente fatal ku nos mester lamentá.CEMS ta pidi pa tene kuenta ku e siguiente tepnan:

• no transportá pasahero den baki di pikòp;
• usa faha di seguridat;
• kore di un forma responsabel;
• no usa demasiado bebida alkohóliko;
• si bo ta stür no bebe;
• no pasa den lus kòrá;
• laga mucha menor di 12 aña sinta parti patras den outo ku su faha di seguridat mará,
• no sinta ku beibi dilanti riba skochi, pero hink’é den su stul,
• no kore ku velosidat haltu,
• kòrda duna preferensha kaminda regla di tráfiko ta indiká esaki,
• chek bo vehíkulo semper promé ku bo sali.

CEMS ta deseá pueblo di Kòrsou un felis temporada di Karnaval